Mga Pwedeng Gawin Para Mabawasan ang Pagsusuka Habang Buntis

Isa sa mga pinaka-ayaw kong part ng pagbubuntis ay yung pagsusuka. Yung tipong kahit ang sarap ng ulam niyo ay hindi mo magawang makain kasi 3 minutes lang ay isusuka mo rin agad. 😂 

Madalas nakararanas ng pagsusuka ang mga buntis sa unang tatlong buwan o first trimester. Kusa rin naman itong nawawala pagsapit ng second trimester (4-6 months). Sa kaso ko naman, 5 buwan akong suka nang suka.

Hindi talaga kaaya-aya sa pakiramdam (at panlasa) yung pagsusuka habang nagbubuntis. Kaya naman, subukan niyo eto mga momsh para makakain kayo nang maayos kahit papaano.

A. Mabagal, pakonti-konti, at madalas na pagkain (small frequent meals)

Kapag ikaw ay buntis, parang yung mga kinakain mo ay hindi bumababa at naiipon lamang sa may lalamunan o dibdib mo. Parang hindi siya bumababa ng tiyan, kaya naman mabilis kang nasusuka.

Kaya mas okay na bagalan at kontian lamang ang mga kinakain mo para hindi agad mapuno yung lalamunan/dibdib mo at mabigyan pa ng time na mas bumaba yung mga pagkaing naunang nilunok mo papunta sa tiyan mo.

Pero paano nga ba gawin yung small frequent meals? Kapag tatanungin ang mga OB natin, napaka-vague ang mga sagot nila. Ang sasabihin lang, basta maunti at madalas. 😅 Kahit yung mga nababasa natin sa internet, malabo rin ang pagkakapaliwanag.

Para mas maintindihan niyo kung paano ba kumain ng small frequent meals, may ginawa akong illustrations:

Sa small frequent meals, hindi niyo kakainin nang isang bagsak yung normal na pagkain niyo sa araw-araw para hindi kayo masuka. Halimbawa, sa agahan, kumakain kayo ng isang takal ng kanin at ulam. Hatiin niyo iyon sa 3 bahagi o portion. Yung unang portion, kainin niyo ng 8am. Yung ika-2, kainin niyo ng 8:30am. Then yung last, 9:00am. 

Yang mga oras na ibinigay ko, pati mga agwat kung kailan mo sila kakainin ay hindi definite rule. Examples lang yan. Kung pakiramdam mo ay hindi mo agad kaya kumain ng 2nd portion ng 8:30am, pwede mo pang habaan ang palugit. Pwede mo ring iksian ang agwat kung kaya mo na agad kainin kahit hindi pa lumilipas ang 30 minutes.

Pwede mo ring gawing 2 portions lang o half rice lang kung kaya mo naman. Pero siyempre, dahil mas maraming pagkain na ang nasa isang portion, mas habaan mo rin ang agwat bago mo kainin yung last portion para hindi ka masuka.

Yung pagkain nang pakonti-konti, hindi talaga siya nakabubusog kasi hindi mo siya isang bagsakan kinakain. Pero at least, hindi ka gutom at mas liliit ang tyansa mo na magsuka.

So kailan na ulit dapat kumain kapag naubos na lahat yung portions ng pagkain? Kung 9am ka natapos kumain ng lahat ng portions, kumain ka ulit nang ganon after 2 or 3 hours. Meaning, 11am or 12nn ka na ulit kakain nang pa-portion-portion.

B. Paggamit ng straw sa mga inumin

Hindi lang pagkain ang sinusuka ng mga buntis. Kahit tubig, gatas, juice, at iba pang mga klase ng inumin ay naisusuka rin. Upang hindi maisuka ang inumin, gumamit ng straw. Kapag kasi rekta mong iniinom sa baso ang inumin, marami agad ang nalalagok mo at mas mabilis mapuno ang tiyan mo. Pero kapag naka-straw ka, pakonti-konti lang ang maiinom mo kasi pasipsip lang ito.

C. Mga pagkain at inumin na hindi gaanong nakakasuka sa buntis

Kung hindi effective yung small frequent meals at gusto mo na talagang may mailaman man lang sa sikmura mo, try mo momsh kumain ng mga sumusunod:

1. Crackers, biskwit, cookies, cupcakes, o tasty

Examples:

• SkyFlakes
• Rebisco
• Magic Flakes
• Fita
• Dewberry Cookies
• Fudgee Bar
• Lava Cake 
• Tasty na may palaman o wala

Bahala ka na momsh kung ang gusto mong kainin ay plain, flavored, o yung may cream filling. Basta nasisikmura mo, pwede na yan. Yung mga ganitong klaseng pagkain kasi ay mataas sa starch at nakatutulong sila para ma-absorb yung stomach acids na nakakapagpa-trigger din ng pagsusuka.

"Eh hindi naman healthy yang mga yan. Baka manaba pa ako at masyadong lumaki ang baby ko." Okay. May mga concern din tayong ganyan. Tama nga naman. Pero mga momsh, siyempre, hinay-hinay lang at kailangan mo ring maghanap ng iba pang food choices na masisikmura mo. 

Pero promise, kung nagsusuka ka, hindi na gaanong big deal sa'yo kung healthy ba o hindi ang kinakain mo. Ang magiging primary concern mo is maghanap kung ano ba ang makakain mo na hindi mo maisusuka. At tsaka, panandalian lang naman iyan. Ang mahalaga may mailalaman ka sa sikmura mo at nang kahit papaano ay may mareceive na pagkain ang baby mo.

2. Malalambot at may sabaw na pagkain

Examples:

• cereal
• oatmeal
• lugaw
• sopas
• instant soups ng Knorr (mushroom soup, crab soup, corn soup, etc.)
• sabaw ng tinola
• sabaw ng nilaga
• sabaw ng sinigang
• instant noodles

Again, ilan sa examples ay hindi healthy like instant soups and instant noodles. Pero kapag gutom na gutom ka na talaga kasi wala ka ng ibang makain at lahat ay isinusuka mo, subukan mo na ring kumain ng mga iyan dahil mas okay pa rin ang may laman ang sikmura. 

3. Mga prutas (pwedeng gawing smoothie, shake, juice, or infused water)

Examples:

• mansanas
• saging
• calamansi
• orange
• lemon
• ponkan
• kiat-kiat
• dalanghita/dalandan
• bayabas
• mangga

Based from experience, eto yung mga prutas na hindi gaanong nakakasuka. Pero hinay-hinay lang sa pagkain ng saging kasi nakakatigas ng pupu yan. Kung hindi niyo bet ang lasa ng mga prutas na ito kapag rektang kinakain, pwede niyo silang gawing smoothie, shake, juice, or infused water.

4. Mani

Examples:

• kasoy na mani (cashew nuts)
• nilagang mani
• roasted nuts
• mga mani na walang balat
• Growers peanuts
• Dingdong
• Hi-Ho
• Happy nuts

Recommended din ang mani na kainin baka kasi kulang ka sa protein kaya ka nagsusuka. Magandang alternative ang mani para makakuha ka ng protein lalo na kung hindi ka makakain ng mga karne. Kung walang nagtitinda sa mga kanto niyo ng mani, pwede na yung mga Dingdong, Hi-Ho, Happy Nuts, at Growers peanuts sa grocery. Marami ring nagtitinda ng mani sa Shopee.

5. French fries at Coke

Oh, tingnan niyo rito. Dietitian ang nagrecommend niyan. Kapag kumakain ng French fries or umiinom ng Coke ang buntis, nababawasan ang episodes ng pagsusuka. Kasi nga, ang main concern lang muna natin dito ay "paano makaka-survive sa morning sickness" at hindi yung gaano ka-healthy ang pagkain.

6. Itlog

Okay din ang itlog para sa buntis na nagsusuka. Parang mani lang ito, rich in protein. Pero siguraduhin na lutong-luto ang itlog para hindi ka mainfect ng salmonella bacteria. Pwede kang magtae kapag nakapasok ang bacteria sa tiyan.

Best luto ng itlog:

• nilagang itlog
• scrambled egg (binating itlog) na lutong-luto

Bawal ang malasado o sunny side up na luto kasi baka nga may salmonella. Pero pwede ang sunny side up kung lulutuin mo din yung pula.

7. Sports drinks

Mainam din daw ang mga sports drinks para sa buntis na nagsusuka kasi may taglay itong electrolytes. Kapag nagsusuka kasi, nauubos na yung mga electrolytes ng katawan gaya ng potassium at sodium. Halimbawa ng sports drinks ay Gatorade. Pero as always, in moderation lang dapat.

8. Salabat o tsaa na gawa sa luya

Pwede ring uminom ng salabat o tsaa na gawa sa luya ang buntis na nagsusuka. Safe naman ito ayon sa mga eksperto basta hanggang 4 cups lang daw. Ayon din sa mga pag-aaral, wala rin daw link ang luya sa maagang pagkalaglag ng bata sa sinapupunan. Healthy naman daw ang salabat para sa buntis na nagsusuka.

Para gumawa ng salabat, magyadyad ng hanggang 5 grams ng luya. Pakuluan ito sa 4 na tasa ng tubig. Pagkatapos ay pwede na itong inumin. Choice mo na kung ngangatain or kakainin mo rin yung luya. Pwede mo rin namang salain.

D. Mga pagkaing nakakapagpatigil ng trigger ng pagsusuka

Examples:

• Candy
• Calamansi

Hindi mo gagamiting alternative yung candy sa pagkain mo ng kanin at ulam. Hindi mo siya gagawing almusal, tanghalian, at hapunan. Kaya sinasabihan ng OB na mag-candy ka ay para hindi ma-trigger yung pagsusuka mo. Sa calamansi naman, pwede kang maggayat ng isang piraso at sipsipin ito para hindi ka rin masuka.

E. Mga scents o amoy na nakakapagpatigil ng trigger ng pagsusuka 

Balat ng calamansi, orange, etc. - Kung para kang masusuka, yung mga pinagbalatan mo ng calamansi o orange ay medyo pigain mo at singhutin. Ok na ok yan lalo na kung working buntis ka at nagcocommute.

White Flower Oil - Kung hindi naman always available ang balat ng calamansi o orange, pwede kang bumili ng White Flower Oil. Panghilot ito na nakalagay sa isang maliit na bottle. Pwede siya sa hilo, sakit ng ulo, at pwede mo ring amuyin para hindi masuka. Meron siyang minty scent. 

My husband's method 😂

Pagbili ng "mahal" na pagkain. Bagama't halos lahat ng nai-share kong methods para mabawasan ang pagsusuka habang buntis ay ginawa ko, feeling ko kulang pa rin. Gustong-gusto ko na talagang kumain nang isang bagsakan yung tipong mabubusog ako pero hindi magsusuka. Kaya naman, ang ginawa ng asawa ko noon, binilhan niya ako ng meal set sa Yakitori (Japanese restaurant sa lugar namin na madalas namin puntahan noong wala pa kaming anak). 

Sabi ng asawa ko sakin, "Oh, eto ang kainin mo. Mahal yan, kaya huwag mong isusuka yan." Nang marinig ko na mahal yun, pinilit ko talagang huwag isuka. At hindi ko nga siya naisuka. Magmula noon, once a week siguro, binibilhan na ako ng asawa ko ng mahal na meal sets para makakain ako. PS: Meal set is nagkakahalaga ng 200-250. Mahal na para sa amin yun. 😂

Sources:

https://www.everydayhealth.com/digestive-health/diet/foods-that-help-relieve-nausea/

https://ph.theasianparent.com/sobrang-pagsusuka-ng-buntis

https://www.cookinglight.com/healthy-living/health/which-foods-to-eat-to-avoid-morning-sickness-effects

https://www.healthline.com/nutrition/foods-to-eat-when-nauseous#TOC_TITLE_HDR_12

https://www.healthline.com/nutrition/ginger-tea-pregnancy#bottom-line

-----------------------------------------

Nagbebenta ako mga nay at tay ng mom, dad, and baby needs. Order naman kayo sa facebook.com/jirapiofficial o sa shopee.ph/jirapiofficial. Thanks!

-----------------------------------------

This blog is originally written by jirapi.blogspot.com and published on Sept. 16, 2020. If you see this blog posted elsewhere, please contact me on this page.